రేణిగుంట, జులై 19: సమాజంలో శాంతిభద్రతలను కాపాడటమే ధ్యేయంగా తిరుపతి జిల్లా ఎస్పీ ఆదేశాల మేరకు, రేణిగుంట డీఎస్పీ శ్రీనివాసరావు సూచనలతో శనివారం రేణిగుంట పోలీస్ స్టేషన్ ఆవరణలో రౌడీ షీటర్లు, సస్పెక్ట్లకు (అనుమానితులకు) ముమ్మర కౌన్సిలింగ్ కార్యక్రమాన్ని నిర్వహించారు. అర్బన్ సీఐ జయచంద్ర, ఎస్సై శ్రీనివాసులు నేతృత్వంలో జరిగిన ఈ కౌన్సిలింగ్లో పోలీస్ స్టేషన్ పరిధిలోని పాత నేరస్థులు, రౌడీ షీటర్ల ప్రస్తుత జీవన విధానం, వారి ప్రవర్తనను పోలీసులు క్షుణ్ణంగా పరిశీలించారు. ఈ సందర్భంగా రేణిగుంట అర్బన్ సీఐ జయచంద్ర రౌడీ షీటర్లను ఉద్దేశించి తీవ్రస్థాయిలో హెచ్చరిస్తూ, మండల పరిధిలో ఎలాంటి అసాంఘిక కార్యకలాపాలకు పాల్పడినా, ప్రజలను భయభ్రాంతులకు గురిచేసినా సహించేది లేదని స్పష్టం చేశారు. పాత కక్షలను పక్కనబెట్టి, నేర ప్రవృత్తిని వీడి సామాన్య పౌరులుగా సమాజంలో గౌరవప్రదంగా జీవించాలని, లేనిపక్షంలో వారిపై పీడీ యాక్ట్ (పీడీ యాక్ట్ ) నమోదు చేయడంతో పాటు జిల్లా బహిష్కరణ వంటి కఠిన చట్టపరమైన చర్యలు తీసుకుంటామని హెచ్చరించారు. ముఖ్యంగా భూదందాలు, సెటిల్మెంట్లు, గంజాయి విక్రయాలు, జూదం వంటి అక్రమ వ్యాపారాలకు దూరంగా ఉండాలని, కాలనీల్లో రాత్రి వేళల్లో అనవసరంగా తిరుగుతూ శాంతిభద్రతలకు విఘాతం కలిగిస్తే ఊరుకునేది లేదని తేల్చిచెప్పారు. ప్రతి ఒక్క రౌడీ షీటర్, సస్పెక్ట్ తమ నివాస ప్రాంతాన్ని విడిచి ఇతర ప్రాంతాలకు వెళ్లాల్సి వస్తే ముందస్తుగా పోలీస్ స్టేషన్లో సమాచారం అందించాలని, స్థానికంగా జరిగే ప్రతి నేరంలోనూ అనుమానితుల కదలికలపై నిరంతర నిఘా ఉంటుందని ఎస్సై శ్రీనివాసులు ఈ సందర్భంగా గుర్తుచేశారు. యువత చెడు మార్గాల వైపు వెళ్లకుండా, నేరాల వల్ల కుటుంబాలు రోడ్డున పడతాయనే విషయాన్ని గ్రహించి, లభించిన అవకాశాన్ని సద్వినియోగం చేసుకుని మంచి నడవడికతో సమాజంలో బతకాలని పోలీసులు హితవు పలికారు. ఈ కార్యక్రమంలో రేణిగుంట పోలీస్ సిబ్బందితో పాటు పలువురు రౌడీ షీటర్లు, నిఘా నీడలో ఉన్న అనుమానితులు పాల్గొన్నారు.
