శ్రీకాళహస్తి నియోజకవర్గంలోని రేణిగుంట పట్టణం వేణుగోపాలపురంలో ఈరోజు నిర్వహించిన స్థానిక సంస్థల ఎన్నికల ప్రచార కార్యక్రమంలో శ్రీకాళహస్తి శాసనసభ్యులు బొజ్జల వెంకట సుధీర్ రెడ్డి పాల్గొన్నారు. రేణిగుంట 5వ సెగ్మెంట్ ఎన్డీఏ కూటమి బీజేపీ ఎంపీటీసీ అభ్యర్థి బి.డి. బాలాజీ తో పాటు, బీజేపీ జెడ్పీటీసీ అభ్యర్థికి మద్దతుగా ఎన్డీఏ కూటమి నాయకులు, కార్యకర్తలతో కలిసి ఇంటింటి ప్రచారం నిర్వహించారు.
ఈ సందర్భంగా వేణుగోపాలపురంలోని వివిధ వీధుల్లో పర్యటిస్తూ స్థానిక ప్రజలను, మహిళలను, యువతను, పెద్దలను నేరుగా కలుసుకుని వారి సమస్యలు, స్థానిక అవసరాలు, అభిప్రాయాలను అడిగి తెలుసుకున్నారు. ప్రజలతో మమేకమవుతూ రాష్ట్రంలో ఎన్డీఏ ప్రభుత్వం అధికారంలోకి వచ్చిన తర్వాత అమలు చేస్తున్న సంక్షేమ పథకాలు, చేపడుతున్న అభివృద్ధి కార్యక్రమాలను వివరించారు.
ముఖ్యంగా తల్లికి వందనం, అన్నదాత సుఖీభవ, ఎన్టీఆర్ భరోసా, స్త్రీశక్తి వంటి సంక్షేమ పథకాల ద్వారా విద్యార్థులు, రైతులు, మహిళలు, వృద్ధులు, పేద కుటుంబాలకు అందుతున్న ప్రయోజనాలను ప్రజలకు వివరించారు. అర్హులైన ప్రతి ఒక్కరికీ ప్రభుత్వ సంక్షేమ ఫలాలు అందించడంతో పాటు, ప్రజల జీవన ప్రమాణాలను మెరుగుపరచడమే ఎన్డీఏ ప్రభుత్వ లక్ష్యమని పేర్కొన్నారు.
అదేవిధంగా రేణిగుంట పట్టణంతో పాటు పరిసర ప్రాంతాల్లో రహదారుల అభివృద్ధి, డ్రైనేజీ వ్యవస్థ మెరుగుదల, తాగునీటి సరఫరా, వీధి దీపాలు, పారిశుధ్యం, విద్య, వైద్య రంగాల్లో మౌలిక సదుపాయాల కల్పనకు ప్రాధాన్యతనిస్తూ ప్రభుత్వం ముందుకు సాగుతోందని వివరించారు. స్థానిక ప్రజల అవసరాలకు అనుగుణంగా అభివృద్ధి కార్యక్రమాలను చేపడుతూ, ప్రజలు ఎదుర్కొంటున్న సమస్యలను సంబంధిత అధికారుల దృష్టికి తీసుకెళ్లి పరిష్కరించేందుకు నిరంతరం కృషి చేస్తున్నట్లు తెలిపారు.
స్థానిక సంస్థలు ప్రజలకు అత్యంత చేరువగా ఉండే పాలనా వ్యవస్థలని, ఎంపీటీసీ, జెడ్పీటీసీ ప్రజాప్రతినిధులు సమన్వయంతో పనిచేస్తూ గ్రామాలు, పట్టణాల సమగ్ర అభివృద్ధికి తోడ్పడాలని ఎమ్మెల్యే గారు ఈ సందర్భంగా పేర్కొన్నారు. ప్రజల సమస్యలను ఎప్పటికప్పుడు గుర్తించి, వాటి పరిష్కారానికి కృషి చేస్తూ అభివృద్ధి కార్యక్రమాలను క్షేత్రస్థాయిలో అమలు చేయడంలో స్థానిక ప్రజాప్రతినిధుల పాత్ర ఎంతో కీలకమని తెలిపారు.
ఈ ఎన్నికల ప్రచార కార్యక్రమంలో ఎన్డీఏ కూటమి నాయకులు, కార్యకర్తలు, స్థానిక ప్రజాప్రతినిధులు, అభిమానులు పాల్గొన్నారు.
