: జిల్లా జాయింట్ కలెక్టర్ ఆర్. గోవిందరావు
వెంకటగిరి, అక్టోబర్ 31: వెంకటగిరి మున్సిపాలిటీ పరిధిలో నవంబర్ 1వ తేదీన నిర్వహించనున్న మున్సిపల్ ఎన్నికలను ప్రశాంత వాతావరణంలో, స్వేచ్ఛాయుతంగా, నిష్పక్షపాతంగా నిర్వహించేందుకు అన్ని ఏర్పాట్లు పూర్తి చేసినట్లు జిల్లా జాయింట్ కలెక్టర్ ఆర్. గోవిందరావు తెలిపారు.
శనివారం వెంకటగిరిలోని ఏపీఆర్జేసీ బాలుర ఉన్నత పాఠశాలలో ఏర్పాటు చేసిన ఎన్నికల సామగ్రి పంపిణీ కేంద్రాన్ని జిల్లా జాయింట్ కలెక్టర్ ఆర్. గోవిందరావు, వెంకటగిరి మున్సిపల్ కమిషనర్ తో కలిసి పరిశీలించారు. ఈ సందర్భంగా పోలింగ్ సిబ్బందికి బ్యాలెట్ బాక్సులు, బ్యాలెట్ పేపర్లు, ఇతర ఎన్నికల సామగ్రి పంపిణీ ప్రక్రియను పరిశీలించి, అధికారులకు పలు సూచనలు చేశారు.
పోలింగ్ సిబ్బందికి అవసరమైన సౌకర్యాలు, రవాణా ఏర్పాట్లు సమకూర్చాలని, ఎన్నికల సామగ్రి పంపిణీలో ఎలాంటి పొరపాట్లకు తావులేకుండా జాగ్రత్తలు తీసుకోవాలని అధికారులను ఆదేశించారు. పోలింగ్ కేంద్రాలకు సిబ్బంది సకాలంలో చేరుకునేలా చర్యలు చేపట్టాలని సూచించారు.
నవంబర్ 1వ తేదీ ఉదయం 7 గంటల నుంచి సాయంత్రం 5 గంటల వరకు పోలింగ్ నిర్వహించనున్న నేపథ్యంలో ఓటర్లు తమ ఓటరు స్లిప్పులో పేర్కొన్న పోలింగ్ కేంద్రానికి చేరుకుని ఓటు హక్కును వినియోగించుకోవాలని కోరారు. గర్భిణులు, బాలింతలు, దివ్యాంగులు, వృద్ధులు, మహిళా ఓటర్లకు అవసరమైన ప్రత్యేక సౌకర్యాలు కల్పించాలని సూచించారు.
ఎన్నికల ప్రవర్తనా నియమావళిని పకడ్బందీగా అమలు చేస్తూ, ఎలాంటి అవాంఛనీయ సంఘటనలకు తావులేకుండా తగిన భద్రతా చర్యలు చేపట్టాలని అధికారులకు సూచించారు. ఎన్నికల విధుల్లో పాల్గొనే అధికారులు, సిబ్బంది ఎన్నికల కమిషన్ మార్గదర్శకాలను తప్పనిసరిగా పాటిస్తూ సమన్వయంతో పనిచేయాలని, ప్రతి ఓటరు ఎలాంటి భయం, ఒత్తిడి లేకుండా స్వేచ్ఛగా తమ ఓటు హక్కును వినియోగించుకునేలా చర్యలు తీసుకోవాలని ఆదేశించారు.
