కలిగిరి నవంబర్ 8 మన ధ్యాస ప్రతినిధి శ్రీకాంత్ కుట్టుబోయిన
స్థానిక సంస్థల ఎన్నికల్లో కలిగిరి మండలం క్రిష్ణారెడ్డిపాలెం ఎంపీటీసీ స్థానాన్ని తెలుగుదేశం పార్టీ కైవసం చేసుకుంది. ప్రతిష్టాత్మకంగా జరిగిన ఈ ఎన్నికల పోరులో టీడీపీ అభ్యర్థి తోకల యమున తన సమీప ప్రత్యర్థిపై 151 ఓట్ల స్పష్టమైన మెజారిటీతో విజయకేతనం ఎగురవేశారు. మొదటి రౌండ్ నుంచే స్పష్టమైన ఆధిక్యం కనబరిచిన యమున, ఓట్ల లెక్కింపు ముగిసేసరికి ఘన విజయాన్ని సొంతం చేసుకోగా, ఈ విజయంతో నియోజకవర్గ వ్యాప్తంగా ఉన్న తెలుగుదేశం పార్టీ శ్రేణుల్లో నూతన ఉత్తేజం, ఉత్సాహం నెలకొంది. తోకల యమున విజయం సాధించినట్లు ఎన్నికల అధికారులు అధికారికంగా ప్రకటించగానే క్రిష్ణారెడ్డిపాలెంలో పసుపు పండుగ మొదలైంది. టీడీపీ నాయకులు, కార్యకర్తలు, అభిమానులు భారీ సంఖ్యలో తరలివచ్చి ఆనందోత్సాహాలు వ్యక్తం చేస్తూ, గ్రామంలోని ప్రధాన వీధుల గుండా భారీ విజయ యాత్ర నిర్వహించారు. బాణసంచా కాలుస్తూ, డప్పు వాయిద్యాల నడుమ నృత్యాలు చేస్తూ, ఒకరికొకరు స్వీట్లు తినిపించుకుంటూ జయహో టీడీపీ అంటూ చేసిన నినాదాలతో క్రిష్ణారెడ్డిపాలెం గ్రామం మొత్తం పండుగ వాతావరణాన్ని తలపించింది. ఈ ఘన విజయం అనంతరం నూతన ఎంపీటీసీ తోకల యమున మాట్లాడుతూ ప్రజా సేవలో తనకు భాగస్వామ్యం కల్పించిన ప్రతి ఓటరు దేవునికి, అహర్నిశలు శ్రమించిన పార్టీ కార్యకర్తలకు, తన విజయానికి సహకరించిన నియోజకవర్గ మరియు మండల స్థాయి ముఖ్య నాయకులకు పేరుపేరునా కృతజ్ఞతలు తెలియజేశారు. ప్రజలు తనపై ఉంచిన నమ్మకాన్ని వమ్ము చేయకుండా నిలబెట్టుకుంటానని స్పష్టం చేస్తూ, గ్రామంలో చాలా కాలంగా పెండింగ్‌లో ఉన్న తాగునీరు, డ్రైనేజీ, అంతర్గత రహదారుల వంటి స్థానిక సమస్యల పరిష్కారానికి తొలి ప్రాధాన్యత ఇస్తానని హామీ ఇచ్చారు. ప్రభుత్వ నిధులతో పాటు స్థానిక నాయకత్వ సహకారంతో క్రిష్ణారెడ్డిపాలెం గ్రామ సమగ్ర అభివృద్ధికి నిరంతరం కృషి చేస్తానని, ప్రజా ప్రతినిధిగా కాకుండా ఒక సేవకురాలిగా గ్రామ ప్రజలందరికీ ఎల్లప్పుడూ అందుబాటులో ఉంటానని తోకల యమున ధీమా వ్యక్తం చేశారు.
