మన న్యూస్, సర్వేపల్లి:- సర్వేపల్లి నియోజకవర్గంలోని ఎంఈఓలతో నెల్లూరు ఆర్ అండ్ బీ గెస్ట్ హౌస్ లో ఎమ్మెల్యే సోమిరెడ్డి చంద్రమోహన్ రెడ్డి సమీక్ష నిర్వహించారు. మోడల్ ప్రైమరీ స్కూళ్ల ఏర్పాటుపై సమీక్ష నిర్వహించారు. వైసీపీ పాలనలో నాడు - నేడు పేరుతో విద్యావ్యవస్థను అస్తవ్యస్తం చేశారన్నారు. ప్రాథమిక పాఠశాలల్లోని 3, 4, 5. తరగతులను తీసుకెళ్లి హైస్కూళ్లలో కలిపి గందరగోళానికి తెరలేపారనీ అన్నారు. ఇప్పుడు విద్యావంతుడైన నారా లోకేష్ బాబు నాయకత్వంలో విద్యారంగంలో విశేష మార్పులు తెస్తున్నామన్నారు. 1, 2 తరగతులకు ఫౌండేషన్ స్కూల్స్, ఇద్దరు టీచర్లతో 1 నుంచి ఐదు తరగతులతో బేసిక్ ప్రైమరీ స్కూళ్లు, 1 నుంచి ఐదు తరగతులకు ఐదుగురు టీచర్లతో మోడల్ ప్రైమరీ స్కూళ్లు రాబోతున్నాయనీ తెలిపారు. మోడల్ ప్రైమరీ స్కూళ్లలో ఐదుగురు టీచర్లతో విద్యా ప్రమాణాలు మెరుగుపడుతాయనీ, స్కూళ్లు చిన్నారులకు కొంచెం దూరమైతే రవాణా ఖర్చుల కోసం ప్రభుత్వం రూ.600 చొప్పున అందించేందుకు సిద్ధమైందనీ తెలిపారు. పేద పిల్లలకు నాణ్యతతో కూడిన విద్యాబోధనే లక్ష్యంగా ప్రభుత్వం మార్పులు చేపట్టిందనీ అన్నారు. ప్రతి ఒక్కరూ సహకరించి విద్యార్థులకు ఉజ్వల భవిష్యత్తు కల్పించేందుకు సహకరించాలని కోరారు.