
గాజువాక మన ధ్యాస ప్రతినిధి నవంబర్ 19: 86 వ వార్డు కార్పొరేటర్ కాకి గోవింద రెడ్డి తుంగలం ప్రాంతంలో గల ఆఫీసులో పత్రికా సమావేశం ఏర్పాటు చేయడం జరిగింది. ఈ సందర్భంగా కాకి గోవింద రెడ్డి మాట్లాడుతూ ప్రజాస్వామ్యం అంటే కేవలం ఓట్లు వేయడం,గెలవడం మాత్రమే కాదు.గెలిచిన తర్వాత చట్టం చెప్పిన పద్ధతిలో పాలన సాగించడమే అసలైన ప్రజాస్వామ్యం.కానీ విశాఖపట్నం మున్సిపల్ కార్పొరేషన్లో జరుగుతున్న పరిణామాలు చూస్తుంటే, ఈ ప్రాథమిక సూత్రాన్నే మరచిపోతున్నారా? అనే అనుమానం కలుగుతోంది.మున్సిపల్ చట్టం చాలా స్పష్టంగా ఉంది. ముందుగా ఎన్నికైన సభ్యులందరూ ప్రమాణ స్వీకారం చేయాలి.ఆ తర్వాత సాధారణ సమావేశం జరగాలి అని తెలిపారు.ఆ సమావేశంలోనే తదుపరి నిర్ణయాలు తీసుకోవాలి.ఇది ఎవరో చెప్పిన మాట కాదు,చట్టం నిర్దేశించిన విధానం.కానీ ఇప్పుడు ఏం జరుగుతోంది? సభ్యులు ప్రమాణ స్వీకారం చేయకుండానే డిప్యూటీ మేయర్,ఎక్స్ అఫీషియో సభ్యుల ఎన్నికకు సిద్ధమవుతున్నారు.ఇది చట్టానికి విరుద్ధం కాదా? అని గోవింద రెడ్డి వేసిన ప్రశ్న ప్రతి పౌరుడి మనసులో మెదులుతున్న ప్రశ్నే.ఆలోచించండి.ప్రమాణం చేయని వ్యక్తి చట్టపరంగా సభ్యుడు అవుతాడా? ప్రమాణం అంటే కేవలం ఒక పదం పలకడం కాదు.అది రాజ్యాంగానికి,చట్టానికి,ప్రజలకు కట్టుబడి ఉంటానని చేసే పవిత్ర ప్రతిజ్ఞ. అలాంటి ప్రతిజ్ఞ చేయకుండా ఓటు వేసే హక్కు ఎలా వస్తుంది? ఆ ఓటుతో జరిగే ఎన్నికకు చట్టబద్ధత ఎలా ఉంటుంది?ఈ విషయంలో ఉన్నతాధికారుల పాత్ర మరింత ఆశ్చర్యం కలిగిస్తోంది అని తెలిపారు. అధికారులకు నిబంధనలు వారికి తెలియవా? అని గోవింద రెడ్డి నిలదీయడం వెనుక కేవలం ఆగ్రహం మాత్రమే లేదు,ప్రజల ఆవేదన ఉంది. ప్రభుత్వం,అధికారులుచట్టాన్ని కాపాడాల్సిన వారే చట్టాన్ని పక్కన పెడితే,సామాన్యుడు ఎవరిని నమ్మాలి?సాధారణ సమావేశం అంటే ఒక లాంఛనం కాదు. కౌన్సిల్లో అది ప్రజల గొంతు. ప్రజాప్రతినిధులందరూ ఒకచోట చేరి,నగర సమస్యలను చర్చించి, ప్రజల కోసం నిర్ణయాలు తీసుకునే వేదిక. కౌన్సిల్ సమావేశం జరగకుండా కీలక నిర్ణయాలు తీసుకోవడం అంటే, ప్రజల గొంతును నొక్కేయడమే.నిజానికి పదవులు శాశ్వతం కాదు అని తెలిపారు.ఈ రోజు ఉన్నవారు రేపు ఉండకపోవచ్చు. ప్రభుత్వ అధికారులు కు తెలుసుకోవలసిన విషయం చట్టం శాశ్వతం. ఈ రోజు నిబంధనలు తప్పి తీసుకున్న నిర్ణయం రేపు మరొకరికి తప్పుడు సంప్రదాయంగా మారుతుంది. అందుకే మొదటి అడుగు నుంచే చట్టాన్ని గౌరవించాలి.గోవింద రెడ్డి డిమాండ్ చాలా స్పష్టంగా తెలుపుతున్నాను. కౌన్సిల్లో ముందు సభ్యుల ప్రమాణ స్వీకారం పూర్తి చేయండి. తర్వాత సాధారణ సమావేశం నిర్వహించండి. ఆ తర్వాతే డిప్యూటీ మేయర్, ఎక్స్ అఫీషియో ఎన్నిక గురించి ఆలోచించండి. ఇది ఎవరికో అనుకూలంగా చెప్పిన మాట కాదు. చట్టం చెప్పిన మార్గం.చట్టాన్ని గౌరవించడం బలహీనత కాదు, అదే నిజమైన బలం. చట్టం ప్రకారం నడిస్తేనే పాలకులపై ప్రజలకు నమ్మకం కలుగుతుంది. నమ్మకం ఉంటేనే పాలన సజావుగా సాగుతుంది. అందుకే మున్సిపల్ చట్టాన్ని గౌరవిద్దాం. నిబంధనల ప్రకారమే ముందుకు సాగుదాం. అప్పుడే ప్రజాస్వామ్యం బతుకుతుంది,విశాఖ అభివృద్ధి చెందుతుంది అని కాకి గోవింద రెడ్డి తెలిపారు.