మన ధ్యాస,తిరుపతి, అక్టోబర్ 22 : వరల్డ్ ఇన్వెస్టర్ వీక్ 2026 సందర్భంగా సెంట్రల్ డిపాజిటరీ సర్వీసెస్ ఇండియా లిమిటెడ్ రీఇమేజిన్ ఐడియాథాన్ 2.0ను ఘనంగా ప్రారంభించింది. ఆర్థిక అవగాహన, సైబర్ భద్రతను బలోపేతం చేసే వినూత్న పరిష్కారాలను అభివృద్ధి చేయాల్సిందిగా భారతదేశం అంతటా ఉన్న విద్యార్థులను ఈ వేదిక ఆహ్వానిస్తోంది. డిజిటల్ మారుతున్న ఇన్వెస్టర్లకు తగినట్లుగా సేవలను అందించడం దీని ప్రధాన ఉద్దేశం.భారతదేశంలో 'సమాజ్ సే ఇన్వెస్టింగ్ సింపుల్' థీమ్‌తో కొనసాగుతున్న ఈ కార్యక్రమం.. సెబీ చేపట్టిన 'ప్రాజెక్ట్ జాగరూక్' ఇన్వెస్టర్ అవగాహన , విద్య లక్ష్యాలకు సంపూర్ణంగా తోడ్పడుతుంది. ఆర్థిక అక్షరాస్యతను పెంచడానికి, సమాచారంతో కూడిన పెట్టుబడి విధానాలను ప్రోత్సహించడానికి , ఆర్థిక మోసాలపై అవగాహన కల్పించడానికి సెబీతో పాటు సీడీఎస్ఎల్ వంటి సెక్యూరిటీస్ మార్కెట్ భాగస్వాములు ఇందులో కలిసి పనిచేస్తున్నాయి. అవగాహన ఉన్న ఇన్వెస్టరే శక్తివంతమైన ఇన్వెస్టర్ అనే భావనతో ఈ కార్యక్రమం రూపుదిద్దుకుంది.సెబీ ఇన్వెస్టర్ సర్వే 2025 ప్రకారం.. దేశంలోని సుమారు 33.72 కోట్ల కుటుంబాలలో 3.21 కోట్ల కుటుంబాలు (9.5 శాతం) మాత్రమే సెక్యూరిటీస్ మార్కెట్ ఉత్పత్తులలో పెట్టుబడి పెట్టాయి. అయితే 63 శాతం కుటుంబాలకు కనీసం ఒక్క సెక్యూరిటీస్ మార్కెట్ ఉత్పత్తి గురించైనా అవగాహన ఉంది. ఈ అవగాహనకు, భాగస్వామ్యానికి మధ్య ఉన్న అంతరాన్ని తగ్గించాల్సిన అవసరం ఉంది. దేశంలో డీమ్యాట్ ఖాతాల సంఖ్య 23 కోట్లు దాటినప్పటికీ, ప్రభుత్వ డేటా ప్రకారం 2025లో సైబర్ మోసాల వల్ల రూ.22,495 కోట్లు నష్టపోయినట్లు వెల్లడైంది. ఇందులో 76 శాతం నష్టాలు నకిలీ పెట్టుబడి , ట్రేడింగ్ స్కామ్‌ల వల్ల జరిగినవే కావడం గమనార్హం.ఈ సందర్భంగా సీడీఎస్ఎల్ ఎండీ, సీఈఓ నేహాల్ వోరా మాట్లాడుతూ.. ఇన్వెస్టర్లు తమంతట తాముగా సమాచారాన్ని అంచనా వేసి, సరైన నిర్ణయాలు తీసుకోగలగాలని పేర్కొన్నారు. యువతకు కూడా ఈ అవగాహనను చేరవేయడానికి అమర్ చిత్ర కథతో భాగస్వామ్యం కుదుర్చుకున్నట్లు తెలిపారు. అంతేకాకుండా, విద్యార్థులలో ఆర్థిక అక్షరాస్యతను పెంచే సెబీ 'మస్ట్'(MUST) కార్యక్రమానికి కూడా ఈ ఐడియాథాన్ తోడ్పాటునందిస్తుంది.పాల్గొనే విద్యార్థులు డిజిటల్ ప్లాట్‌ఫారమ్‌లు, మొబైల్ యాప్‌లు, వెబ్‌సైట్‌లు, చాట్‌బాట్‌లు, గేమ్‌లు, సిమ్యులేషన్‌లు, లెర్నింగ్ మోడ్యూల్స్, అవగాహన ప్రచారాలు లేదా ఏఐ-ఎనేబుల్డ్ అసిస్టెంట్ల రూపంలో తమ ఆలోచనలను సమర్పించవచ్చు. ఆవిష్కరణ, యూజర్ అనుభవం, ప్రభావం, అమలు సాధ్యత, డేటా రక్షణ వంటి అంశాల ఆధారంగా నిపుణుల జ్యూరీ వీటిని పరిశీలిస్తుంది. టీసీఎస్ మాజీ సీఈఓ, కర్మయోగి భారత్ చైర్‌పర్సన్ ఎస్. రామదొరై ఈ జ్యూరీకి అధ్యక్షత వహిస్తారు.అక్టోబర్ 7, 2026 నుంచి రిజిస్ట్రేషన్లు ప్రారంభమయ్యాయి. అత్యుత్తమ ప్రతిభ కనబరిచిన టాప్ ఐదు టీమ్‌లకు మొత్తం రూ.11.5 లక్షల ప్రైజ్ పూల్ అందజేస్తారు. గతంలో మొదటి రీఇమేజిన్ ఐడియాథాన్‌కు భారీ స్పందన లభించగా, ఇప్పుడు దాని విజయంతో ఈ రెండో విడతను మరింత విస్తృతంగా నిర్వహిస్తున్నారు.