​రేణిగుంట:

మద్యం సేవించి వాహనాలు నడిపే వారిపై పోలీసులు, న్యాయస్థానాలు ఉక్కుపాదం మోపుతున్నాయి. మద్యం మత్తులో వాహనం నడిపి పట్టుబడిన ఒక వ్యక్తికి తిరుపతి స్పెషల్ జెఎస్‌సిఎమ్ కోర్టు 7 రోజుల సాధారణ కారాగార శిక్షతో పాటు ₹10,000 జరిమానా విధిస్తూ సంచలన తీర్పు వెలువరించింది.

​రేణిగుంట అర్బన్ పోలీస్ స్టేషన్ పరిధిలో నిర్వహించిన డ్రంక్ అండ్ డ్రైవ్ తనిఖీల్లో రేణిగుంట మండలం, వేణుగోపాలపురం గ్రామానికి చెందిన వై . ధాము (35), తండ్రి: దివంగత వై . సుబ్రహ్మణ్యం, మద్యం మత్తులో వాహనం నడుపుతూ పోలీసులకు పట్టుబడ్డాడు.

​పోలీసులు నమోదు చేసిన కేసు ఆధారంగా శుక్రవారం (09-10-2026) నిందితుడిని తిరుపతిలోని స్పెషల్ కోర్టులో హాజరుపరిచారు. విచారణ సమయంలో నిందితుడు తాను చేసిన నేరాన్ని అంగీకరించడంతో, మోటార్ వెహికల్స్ (ఎంవీ ) చట్టం సెక్షన్ 185(బి ) కింద నేరం రుజువైనట్లు న్యాయమూర్తి ప్రకటించారు.

​ఈ మేరకు నిందితుడికి 7 రోజుల సాధారణ కారాగార శిక్ష (09-10-2026 నుండి 15-10-2026 వరకు) విధించడంతో పాటు ₹10,000 జరిమానా విధిస్తూ తీర్పు చెప్పారు.

​మద్యం మత్తులో వాహనాలు నడిపి తమ జీవితాలను, ఇతరుల ప్రాణాలను ప్రమాదంలోకి నెట్టవద్దని, ట్రాఫిక్ నిబంధనలు అతిక్రమిస్తే ఎంతటివారైనా కఠిన చర్యలు తప్పవని రేణిగుంట అర్బన్ పోలీసులు ఈ సందర్భంగా హెచ్చరించారు.