​సోషల్ మీడియాలో వ్యాప్తి చెందే అసత్య, దుష్ప్రచార సమాచారాన్ని సమర్థవంతంగా అరికట్టేందుకు చర్యలు.

: జిల్లా కలెక్టర్ డాక్టర్ ఎస్. వెంకటేశ్వర్.

​ఎన్నికల భద్రతపై ప్రత్యేక నిఘా.. నిబంధనలు ఉల్లంఘిస్తే కఠిన చర్యలు

: జిల్లా ఎస్ పి ఎల్. సుబ్బారాయుడు.

​తిరుపతి, అక్టోబర్ 08:

స్థానిక సంస్థల ఎన్నికలను పారదర్శకంగా, నిష్పక్షపాతంగా నిర్వహించాలని తిరుపతి జిల్లా కలెక్టర్ డాక్టర్ ఎస్. వెంకటేశ్వర్, ఎస్పీ ఎల్. సుబ్బారాయుడు అధికారులను ఆదేశించారు. రాష్ట్ర ఎన్నికల కమిషనర్ అనిల్ చంద్ర పునేత వీడియో కాన్ఫరెన్స్ అనంతరం కలెక్టరేట్ నుండి జాయింట్ కలెక్టర్ ఆర్. గోవిందరావు, మున్సిపల్ కమిషనర్ ఎం. జయకృష్ణలతో కలిసి అధికారులతో సమీక్ష నిర్వహించారు.

​ఎన్నికల ముందస్తు ఏర్పాట్లలో భాగంగా పోలింగ్ కేంద్రాలు, సామగ్రి, సిబ్బందిని సిద్ధం చేసుకోవాలని కలెక్టర్ సూచించారు. జాయింట్ కలెక్టర్ ఎన్నికల సమన్వయకర్తగా ఉంటారని, నేరుగా జరిగే మేయర్, చైర్‌పర్సన్ ఎన్నికల అధికారులకు శిక్షణ ఇవ్వాలన్నారు. మున్సిపల్, పంచాయతీ టెండర్లను సమీక్షించి, సోషల్ మీడియా దుష్ప్రచారాలను సమర్థవంతంగా అరికట్టాలని ఆదేశించారు.

​ఎస్పీ సుబ్బరాయుడు మాట్లాడుతూ.. సెన్సిటివ్, హైపర్ సెన్సిటివ్ ప్రాంతాలను గుర్తించి, కంట్రోల్ రూమ్‌లు, స్ట్రాంగ్ రూమ్‌ల వద్ద పటిష్ట భద్రత కల్పిస్తామన్నారు. ఎక్సైజ్, ఫారెస్ట్, ఆర్టీఏ, ఎన్‌సీసీ, ఎన్‌ఎస్‌ఎస్ విభాగాలు/సంస్థల నుంచి అదనపు సిబ్బందిని సమన్వయం చేసుకుంటున్నట్లు తెలిపారు. పోలింగ్ కేంద్రాల వద్ద విస్తృత వీడియో గ్రఫీ, సీసీ కెమెరాల నిఘా ఉంటుందని, నిబంధనలు ఉల్లంఘిస్తే కఠిన చర్యలు ఉంటాయని హెచ్చరించారు. ఈ సమావేశంలో ఆర్డీఓలు, డిపిఓ సుశీలా దేవి, జెడ్పీ డిప్యూటీ సీఈఓ వెంకట నారాయణ, ఎన్నికల విభాగాల అధికారులు పాల్గొన్నారు.