​రేణిగుంట (07/10/2026):

రేణిగుంట రైల్వే స్టేషన్ వాహనాల పార్కింగ్ ఆవరణలో జరుగుతున్న అక్రమ వసూళ్లను తక్షణమే అరికట్టాలని డిమాండ్ చేస్తూ ఏఐటీయూసీ ( ఏఐటియుసి ) ఆధ్వర్యంలో బుధవారం ఉదయం రైల్వే స్టేషన్ ఎదుట ఆటో కార్మికులు భారీ ధర్నా నిర్వహించారు.

​ఈ ధర్నాలో ఏపీ ఆటో అండ్ మోటార్ వర్కర్స్ యూనియన్ రాష్ట్ర అధ్యక్షులు ఏపీ బాల, తిరుపతి జిల్లా ప్రధాన కార్యదర్శి ఎం. శివ పాల్గొని మాట్లాడారు. పుణ్యక్షేత్రం తిరుపతికి అనుసంధానంగా ఉన్న రేణిగుంట స్టేషన్‌లో ప్రయాణికులను దించడానికి, ఎక్కించుకోవడానికి వచ్చే ఆటోల నుంచి అక్రమంగా ప్రవేశ రుసుము వసూలు చేస్తున్నారని మండిపడ్డారు. దేశంలో ఎక్కడ లేని విధంగా ఇక్కడ పార్కింగ్ నిర్వాహకులు దందాలకు పాల్పడుతున్నా, అడిగిన డ్రైవర్లపై దాడులు చేస్తున్నా రైల్వే అధికారులు పట్టించుకోకపోవడం దారుణమని, ఇందులో అధికారుల పాత్రపై అనుమానాలు ఉన్నాయని వారు ఆరోపించారు. స్టేషన్ ఆవరణలో ఉచిత ప్రవేశానికి సంబంధించిన బోర్డులు వెంటనే ఏర్పాటు చేయాలని డిమాండ్ చేశారు.

​అనంతరం ఈ సమస్యపై సీసీఐ ( సీసీఐ ) అధికారి జగన్‌కు వినతిపత్రం సమర్పించారు. దీనిపై అధికారి సానుకూలంగా స్పందిస్తూ.. అక్రమ వసూళ్లకు పాల్పడుతున్న కాంట్రాక్టర్‌పై గతంలోనే పెనాల్టీలు విధించామని, రెండు రోజుల్లో ఉచిత ప్రవేశానికి సంబంధించిన బోర్డులు ఏర్పాటు చేస్తామని హామీ ఇచ్చారు. ప్రయాణికులను దించేందుకు వచ్చేవారు ఎలాంటి రుసుము చెల్లించాల్సిన అవసరం లేదని స్పష్టం చేయడంతో ధర్నా విరమించారు.

​ఈ కార్యక్రమంలో రేణిగుంట మండల అధ్యక్షులు కార్తీక్, ఆటో యూనియన్ అధ్యక్షులు ఎస్. సురేష్, నాయకులు రమణ, సెల్వ, ఎం. వెంకటేష్, బి. ప్రమీల, కాశి, నవీన్ తదితరులు పాల్గొన్నారు.