• సీసీటీవీ సాంకేతిక విశ్లేషణతో ఆటో-రిక్షాను గుర్తించి గంటల వ్యవధిలోనే విలువైన ఆభరణాల స్వాధీనం.
• శాంతిభద్రతల పరిరక్షణ, నేరాల నియంత్రణతో పాటు పోగొట్టుకున్న ఆస్తుల గుర్తింపులో కీలక భూమిక పోషిస్తున్న తిరుపతి జిల్లా కమాండ్ అండ్ కంట్రోల్ సెంటర్.
• ప్రజల్లో విశ్వాసాన్ని మరింత బలోపేతం చేస్తున్న తిరుపతి జిల్లా పోలీసు శాఖ- .

తిరుపతి ఆగస్టు 02: తిరుపతి జిల్లా ఎస్పీ ఎల్. సుబ్బరాయుడు, ఐపీఎస్., నాయకత్వంలో తిరుపతి జిల్లా కమాండ్ అండ్ కంట్రోల్ సెంటర్ ఆధునిక సాంకేతిక పరిజ్ఞానాన్ని సమర్థవంతంగా వినియోగిస్తూ శాంతిభద్రతల పరిరక్షణ, నేరాల నియంత్రణ, నేరాల ఛేదనతో పాటు ప్రజలు పోగొట్టుకున్న విలువైన ఆస్తులను గుర్తించి సురక్షితంగా తిరిగి అప్పగించడంలో కీలక పాత్ర పోషిస్తోంది.ఈ క్రమంలో గుత్తివారిపల్లికి చెందిన పి. మల్లేశ్వరి తన కోడలిని చికిత్స నిమిత్తం ప్రసూతి ఆసుపత్రిలో చేర్పించి ఇంటికి తిరిగి వస్తున్న సమయంలో పొరపాటున తన హ్యాండ్‌బ్యాగ్‌ను ఆటో-రిక్షాలో మర్చిపోయారు. అనంతరం వెస్ట్ పోలీస్ స్టేషన్‌లో ఫిర్యాదు చేస్తూ, ఆ బ్యాగ్‌లో ఒక బంగారు గొలుసు, ఒక జత బంగారు చెవిపోగులు (మొత్తం సుమారు 20 గ్రాములు), ఒక జత వెండి కాలి గొలుసులు (సుమారు 15 గ్రాములు) ఉన్నట్లు తెలిపారు.
ఫిర్యాదు అందుకున్న వెంటనే వెస్ట్ పోలీస్ స్టేషన్ పోలీసులు స్పందించి తిరుపతి కమాండ్ అండ్ కంట్రోల్ సెంటర్ బృందంతో సమన్వయం చేసుకుని పరిసర ప్రాంతాల్లోని సీసీటీవీ దృశ్యాలను క్షుణ్ణంగా పరిశీలించారు. సాంకేతిక విశ్లేషణ ద్వారా ఏపీ 03టిల్ 0926 నంబర్ గల ఆటో-రిక్షాను గుర్తించి, దాని డ్రైవర్ భావజాన్ను సంప్రదించారు. ఆటోలో పరిశీలించగా హ్యాండ్‌బ్యాగ్ యథాతథంగా ఉన్నట్లు నిర్ధారించుకుని వెంటనే వెస్ట్ పోలీస్ స్టేషన్‌కు తీసుకురావాలని సూచించారు.వెస్ట్ పోలీస్ స్టేషన్ ఎస్‌ఐ శ్రీ సుబ్బారెడ్డి ఆటో డ్రైవర్ నుంచి హ్యాండ్‌బ్యాగ్‌ను స్వీకరించి, అందులోని బంగారు, వెండి ఆభరణాలను ధృవీకరించి ఎలాంటి నష్టం లేకుండా ఫిర్యాదుదారు పి. మల్లేశ్వరికి సురక్షితంగా అప్పగించారు.ఈ సందర్భంగా పి. మల్లేశ్వరి మాట్లాడుతూ, పోగొట్టుకున్న విలువైన ఆభరణాలను అత్యంత వేగంగా గుర్తించి తిరిగి అందించిన తిరుపతి జిల్లా పోలీసు శాఖకు, జిల్లా ఎస్పీ ఎల్. సుబ్బరాయుడు, ఐపీఎస్., కమాండ్ అండ్ కంట్రోల్ సెంటర్ బృందానికి, వెస్ట్ పోలీస్ స్టేషన్ అధికారులకు హృదయపూర్వక కృతజ్ఞతలు తెలిపారు. ఈ సందర్భంగా జిల్లా ఎస్పీ ఎల్. సుబ్బరాయుడు, ఐపీఎస్., మాట్లాడుతూ, ప్రజలకు సత్వర, పారదర్శక, సాంకేతిక ఆధారిత పోలీసు సేవలు అందించడమే తిరుపతి జిల్లా పోలీసు శాఖ లక్ష్యమని తెలిపారు. ప్రజలు విలువైన వస్తువులు పోగొట్టుకున్నా, అనుమానాస్పద సంఘటనలు గమనించినా లేదా అత్యవసర పరిస్థితుల్లో వెంటనే సమీప పోలీస్ స్టేషన్ లేదా డయల్-112ను సంప్రదించాలని సూచించారు. కమాండ్ అండ్ కంట్రోల్ సెంటర్ ద్వారా అందుబాటులో ఉన్న ఆధునిక సాంకేతిక వ్యవస్థలను వినియోగించి ప్రజలకు మరింత వేగంగా, సమర్థవంతంగా సేవలు అందిస్తామని పేర్కొన్నారు.