​రేణిగుంట: రైలు ప్రయాణంలో జరిగిన ఒక దురదృష్టకర ఘటనలో ఓ యువకుడు తన కాలును కోల్పోయిన సంఘటన రేణిగుంటలో చోటు చేసుకుంది.

​స్థానిక వసుంధర నగర్ సమీపంలోని రైల్వే ట్రాక్ వద్ద ఈ ప్రమాదం జరిగింది. వివరాల్లోకి వెళితే.. గణేష్ (30) అనే యువకుడు రైలులో తిరుపతికి ప్రయాణిస్తున్నాడు. రైలు వసుంధర నగర్ ప్రాంతంలో వెళ్తుండగా, ప్రమాదవశాత్తు జారి కింద పడిపోయాడు. ఈ క్రమంలో రైలు చక్రాలు యువకుడి కాలుపై నుండి వెళ్లడంతో ఒక కాలు పూర్తిగా తెగిపోయింది.

​ప్రమాదాన్ని గమనించిన స్థానికులు వెంటనే 108 అంబులెన్స్‌కు సమాచారం అందించారు. తీవ్ర రక్తస్రావంతో ఉన్న బాధితుడిని చికిత్స నిమిత్తం తిరుపతిలోని ఎస్వీఆర్ఆర్ (రుయా) ఆసుపత్రికి తరలించారు. ప్రస్తుతం బాధితుడు ఆసుపత్రిలో చికిత్స పొందుతున్నాడు. రైల్వే పోలీసులు ఘటనపై సమాచారం సేకరిస్తున్నారు.