కుమ్మరకొండూరులో నూతన గ్రామపంచాయతీ భవనానికి శంకుస్థాపన.

32 లక్షల నిధులతో గ్రామపంచాయతీ నిర్మాణమునకు శ్రీకారం.

కలిగిరి మార్చి 23,మన న్యూస్ ప్రతినిధి, (నాగరాజు కె )

కలిగిరి మండలం కుమ్మరకొండూరు గ్రామంలో 32 లక్షల రూపాయల నిధులతో నిర్మించనున్న నూతన గ్రామపంచాయతీ భవన నిర్మాణ శంకుస్థాపన కార్యక్రమంలో ఉదయగిరి శాసనసభ్యులు కాకర్ల సురేష్ పాల్గొని శిలాఫలకాన్ని ఆవిష్కరించారు.
ఈ సందర్భంగా ఎమ్మెల్యే కాకర్ల సురేష్ మాట్లాడుతూ, ముఖ్యమంత్రి నారా చంద్రబాబు నాయుడు దూరదృష్టి నాయకత్వంలో, ఉప ముఖ్యమంత్రి కొణిదల పవన్ కళ్యాణ్ సహకారంతో రాష్ట్రవ్యాప్తంగా గ్రామీణాభివృద్ధికి ప్రత్యేక ప్రాధాన్యత ఇస్తున్నామని తెలిపారు. గ్రామ పంచాయతీ భవనాలు కేవలం కార్యాలయాలుగా మాత్రమే కాకుండా, ప్రజా సమస్యలకు పరిష్కార మార్గాలను చూపే ప్రజాసేవా కేంద్రాలుగా రూపుదిద్దుకుంటున్నాయని అన్నారు.నూతన గ్రామపంచాయతీ భవనం నిర్మాణం పూర్తయిన తరువాత గ్రామ ప్రజలకు ప్రభుత్వ సేవలు మరింత సులభంగా అందుబాటులోకి వస్తాయని ఎమ్మెల్యే పేర్కొన్నారు. ప్రజలు తమ అవసరాలను నేరుగా అధికారుల దృష్టికి తీసుకెళ్లేందుకు ఇది ఎంతో ఉపయోగకరంగా నిలుస్తుందని వివరించారు.గ్రామ పంచాయతీ కార్యాలయం సక్రమంగా ఉండడం వల్ల ప్రజల సమస్యలు వేగంగా నమోదు కావడంతో పాటు, వాటి పరిష్కార ప్రక్రియ కూడా త్వరితగతిన సాగుతుందని ఆయన అన్నారు.గ్రామస్థాయి పరిపాలన బలోపేతం అయితేనే గ్రామాలు అభివృద్ధి పథంలో ముందుకు సాగుతాయని, అదే లక్ష్యంతో ప్రభుత్వం ప్రతి గ్రామానికి అవసరమైన మౌలిక సదుపాయాల కల్పనపై దృష్టి సారించిందని తెలిపారు.కుమ్మరకొండూరు గ్రామానికి ఈ నూతన భవనం ఒక అభివృద్ధి చిహ్నంగా నిలుస్తుందని, రాబోయే రోజుల్లో ప్రజలకు మరింత మెరుగైన సేవలను అందించే కేంద్రంగా మారుతుందని ఎమ్మెల్యే ఆశాభావం వ్యక్తం చేశారు. గ్రామ ప్రజల సహకారంతో అభివృద్ధి పనులను వేగవంతం చేస్తూ, ప్రతి గ్రామాన్ని ఆదర్శ గ్రామంగా తీర్చిదిద్దే దిశగా ప్రభుత్వం కట్టుబడి పనిచేస్తోందని స్పష్టం చేశారు.