ఉదయగిరి నియోజకవర్గ నీటిపారుదల సమస్యలపై సమీక్ష.

వింజమూరు జనవరి 24, మన న్యూస్,(నాగరాజు కె ).

తెలుగుదేశం పార్టీ ప్రధాన కార్యాలయంలో నీటిపారుదల శాఖ అధికారులతో ఉదయగిరి శాసనసభ్యులు కాకర్ల సురేష్ సమగ్ర సమీక్ష సమావేశాన్ని నిర్వహించారు. ఈ సమావేశంలో ఉదయగిరి నియోజకవర్గానికి సంబంధించిన నీటిపారుదల వ్యవస్థ, సాగునీటి లభ్యత, ప్రస్తుత సమస్యలు మరియు భవిష్యత్ అవసరాలపై సుదీర్ఘంగా చర్చ జరిగింది.సమీక్ష సమావేశంలో నియోజకవర్గంలోని వివిధ మండలాలకు చెందిన పార్టీ నాయకులు, ప్రజాప్రతినిధులు తమ తమ ప్రాంతాల్లో ఎదురవుతున్న సాగునీటి సమస్యలను ఇరిగేషన్ శాఖ అధికారుల దృష్టికి తీసుకువచ్చారు. ముఖ్యంగా కాలువల మరమ్మతులు, చెరువుల పూడికతీత, నీటి సరఫరాలో ఎదురవుతున్న అడ్డంకులు వంటి కీలక అంశాలపై వివరంగా ప్రస్తావించారు.ఈ సందర్భంగా ఎమ్మెల్యే కాకర్ల సురేష్ మాట్లాడుతూ, రైతుల సమస్యలపై ప్రభుత్వం పూర్తిస్థాయిలో స్పందిస్తుందని, నీటిపారుదల సమస్యల పరిష్కారం కోసం తాను నిరంతరం కృషి చేస్తానని భరోసా ఇచ్చారు. ముఖ్యంగా ఈ కారు పంటకు ఎలాంటి ఆటంకాలు లేకుండా సమయానుకూలంగా సాగునీరు అందేలా తగిన చర్యలు చేపట్టాలని ఇరిగేషన్ శాఖ అధికారులను ఆయన స్పష్టంగా ఆదేశించారు. రైతుల ప్రయోజనాలే ప్రథమ లక్ష్యంగా పనిచేయాలని సూచించారు.అదేవిధంగా, నియోజకవర్గం లోని చెరువులు, కుంటలు పూర్తిగా పునరుద్ధరించాల్సిన అవసరం ఉందని ఎమ్మెల్యే గారు తెలిపారు. చెరువుల పూడికతీత పనులను వేగవంతంగా చేపట్టి, నీటి నిల్వ సామర్థ్యాన్ని పెంచడం ద్వారా భూగర్భ జలాల స్థాయిని మెరుగుపరచవచ్చని పేర్కొన్నారు. దీర్ఘకాలిక సాగునీటి భద్రత సాధించడమే లక్ష్యంగా సమగ్ర ప్రణాళికతో ముందుకు సాగాలని అధికారులకు దిశానిర్దేశం చేశారు.ఈ సమీక్ష సమావేశం ద్వారా ఉదయగిరి నియోజకవర్గంలోని నీటిపారుదల సమస్యలకు శాశ్వత పరిష్కారాలు కనుగొని, రైతులకు భరోసా కల్పించే దిశగా ప్రభుత్వం మరియు అధికార యంత్రాంగం సమన్వయంతో పనిచేస్తుందని ఎమ్మెల్యే గారు స్పష్టం చేశారు.