Mana Cinema :- సుబిషి ఎంటర్టైన్మెంట్స్ నిర్మించిన లగ్గం ఓటిటి లో విడుదలై పది రోజులు అవుతున్నా లగ్గం సందడి తగ్గలేదు. రెండు మనసులు ముడి పడడమే "లగ్గం" అంటే.. అనే థీమ్ తో వచ్చిన ఈ చిత్రం ఆహా, అమెజాన్ ప్రైమ్ లో టాప్ లో ట్రెండ్ అవుతోంది. తమ పెళ్లి క్యాసెట్ చూసుకున్నంత మురిపెంగా, సంబరంగా ప్రేక్షకులు ఈ చిత్రాన్ని చూస్తున్నారు. తడి ఆరని కన్నులతో తమ స్పందనల్ని సోషల్ మీడియా వేదికల మీద పంచుకుంటున్నారు. తెలంగాణ నేపథ్యంలో చెప్పిన ప్రతి తెలుగింటి కథ "లగ్గం".. అంటూ నీరాజనాలు పడుతున్నారు. ప్రవాసాంధ్రులైతే మరొక "పెళ్లి పుస్తకం" అని చెబుతున్నారు. ఈ స్పందనలన్నీ చూశాక.. "ఇదిగాక సౌభాగ్య మిదిగాక తపము మఱి ,యిదిగాక వైభవం బిఁక నొకటి కలదా.." అనే అన్నమాచార్యుని ఆనందమే చిత్రబృందానిది. OTT లో హిట్ అయినా సందర్బంగా ఈరోజు రామానాయుడు స్టూడియోలో నటకిరిటి రాజేంద్రప్రసాద్, చిత్ర రచయిత & దర్శకుడు రమేశ్ చెప్పాల, చరణ్ అర్జున్, ఎడిటర్ నాగేశ్వర్ రెడ్డి, రచ్చ రవి, వడ్లమాని, వివా రెడ్డి ఇంకా ఈ చిత్రంలో నటించిన నటీనటులు, సాంకేతిక నిపుణులు పాల్గొని కేక్ కట్ చేసి విజయోత్సవాలు జరుపుకున్నారు. దర్శకుడు మాట్లాడుతూ "లగ్గం సినిమా నాకు దర్శకుడిగా మంచి గుర్తింపు తీసుకొచ్చింది. అన్ని వర్గాల ప్రేక్షకుల నుంచి అభినందనలు వస్తున్నాయి. ఇంకా చూడని వాళ్ళు అమెజాన్,ఆహాలో గాని తప్పకుండా చూడండి." అన్నారు. రాజేంద్రప్రసాద్ మాట్లాడుతూ" థియేటర్లో మంచి టాక్ తెచ్చుకున్న లగ్గం చిత్రం ఓటీటిలో నెంబర్ వన్ ట్రేండింగ్ లో ఉండడం సంతోషంగా ఉంది. "అన్నారు. ఈ చిత్రానికి కథ - మాటలు - స్క్రీన్ ప్లే- దర్శకత్వం రమేశ్ చెప్పాల, నిర్మాత: వేణుగోపాల్ రెడ్డి, నేపధ్య సంగీతం: మణిశర్మ, కెమెరామెన్: బాల్ రెడ్డి. సంగీతం:చరణ్ అర్జున్. ఎడిటర్: బొంతల నాగేశ్వర రెడ్డి. కొరియోగ్రఫీ: అజయ్ శివశంకర్.