మన ధ్యాస చిత్తూరు ఆగస్ట్-29 జడ్పిపిఎఫ్ రుణాలు తుది మొత్తాల చెల్లింపులలో నెలకొన్న తీవ్ర జాప్యాన్ని నివారించాలని రాష్ట్రోపాధ్యాయ సంఘం (ఎస్టీయూ)చిత్తూరు జిల్లా శాఖ డిమాండ్ చేసింది. ఈ మేరకు ఎస్ టి యు చిత్తూరు జిల్లా శాఖ అధ్యక్ష ప్రధాన కార్యదర్శులు మదన్మోహన్ రెడ్డి, మోహన్ యాదవ్, రాష్ట్ర అసోసియేట్ అధ్యక్షులు గంటా మోహన్ తదితరులతో కూడిన ప్రతినిధి బృందం, శుక్రవారం సాయంత్రం జిల్లా పరిషత్ డిప్యూటీ సీఈఓ వెంకటనారాయణని కలిసి ఒక వినతి పత్రం సమర్పించింది. ఈ సందర్భంగా నాయకులు మాట్లాడుతూ, తమ జీతాల నుంచి నెల నెల పొదుపు చేసుకున్న మొత్తాల నుండి అవసరానికి రుణాలు పొందాలన్నా తీవ్ర ఇబ్బందులు ఎదురవుతున్నాయని పేర్కొన్నారు. పదవీ విరమణ చెందినవారికి గౌరవప్రదంగా తుది మొత్తాలు చెల్లించాల్సి ఉండగా, నెలల తరబడి వారు తిరగాల్సి రావడం ఆవేదన కలిగిస్తోందన్నారు. మిస్సింగ్ క్రెడిట్స్  కు సంబంధించి స్పెషల్ డ్రైవ్ నిర్వహించాలని విజ్ఞప్తి చేశారు. ఈ విషయంలో జీతాల డ్రాయింగ్ అధికారులను పూర్తిస్థాయిలో భాగస్వాములను చేయాలని కోరారు. ఏ ఒక్క ఉద్యోగి తమ మిస్సింగ్ క్రెడిట్ జమ చేయడం కోసం పిఎఫ్ కార్యాలయం చుట్టూ తిరగాల్సిన అవసరం లేకుండా చూడాలని కోరారు. పీఎఫ్ ఖాతాదారుల అకౌంట్లో జమ కాకుండా, సస్పెన్స్ అకౌంట్లో ఉన్న కోట్లాది రూపాయల మొత్తాలకు జమవుతున్న వడ్డీ ఏమవుతుందో పరిశీలించాలని కోరారు. వీలైనంత త్వరగా జిల్లాలోని డ్రాయింగ్ అధికారులు అందరితో, పిఎఫ్ సమస్యలకు సంబంధించి ప్రత్యేక సమావేశం ఏర్పాటు చేయాలని విజ్ఞప్తి చేశారు డిప్యూటీ సీఈఓ వెంకటనారాయణ మాట్లాడుతూ, తుది మొత్తాల చెల్లింపులకు సంబంధించి ఆడిట్ విభాగంలో ఎదురవుతున్న అభ్యంతరాలను పరిశీలించామని తెలిపారు. వీలైనంత వేగంగా రుణాలు తుది మొత్తాలు చెల్లించే విధంగా చర్యలు తీసుకుంటామని తెలిపారు. పీఎఫ్ మిస్సింగ్ క్రెడిట్స్ సంబంధించి ప్రత్యేక కార్యాచరణ రూపొందిస్తామని హామీ ఇచ్చారు
కార్యక్రమంలో నాయకులు దేవరాజులు రెడ్డి, చంద్రన్,శేఖర్, వాసు, బాలచంద్రారెడ్డి, అమర్నాథ్ రెడ్డి, గుణశేఖర్, ఢిల్లీ బాబు,భరత్, వెంకటేష్, తదితరులు పాల్గొన్నారు.