శ్రీకాళహస్తి, మన న్యూస్ :- తెలుగు రాష్ట్రాలలో ప్రముఖ మీడియా ఛానల్ గా గుర్తింపు పొందిన మహా న్యూస్ కు చెందిన హైదరాబాద్ నగరంలోని ప్రధాన కార్యాలయంపై శనివారం కొంతమంది దాడి చేసి విధ్వంసానికి పాల్పడటం అనైతిక చర్యలకు నిదర్శనం అని తెలుగుదేశం పార్టీ, బిసి విభాగం రాష్ట్ర కార్యనిర్వాహక కార్యదర్శి డా.యం.ఉమేష్ రావు ఆరోపించారు. హైదరాబాద్‌లో గల మహా టీవీ హెడ్ ఆఫీసుపై దాడిని ప్రజాస్వామ్య వాదులంతా తీవ్రంగా ఖండించాలని, ప్రజావాణి వినిపించే మీడియాపై దాడిని ప్రజాస్వామ్యంపై దాడిగానే పరిగణించాలని పేర్కొన్నారు. మహా టీవీపై దాడి చేసినవారిపై చర్యలు తీసుకోవాలని తెలంగాణ ప్రభుత్వాన్ని విజ్ఞప్తి చేస్తూ, వార్తా కథనాలు, వార్తా ప్రసారాల పట్ల అభ్యంతరాలు ఉంటే నిబంధనలను అనుసరిస్తూ పరిష్కారానికి చొరవ చూపాలి కానీ, ఇలా భౌతిక దాడులకు దిగడం అత్యంత హేయమైన చర్య అని ఆరోపించారు. ప్రజాస్వామ్య వ్యవస్థకు కాపలాదారుగా భావించే మీడియా రంగాన్ని భయభ్రాంతులకు గురి చేసి లొంగదీసుకోవాలనుకునే వారి దుశ్చర్యలను ఖండిస్తూ, మహా యాజమాన్యానికి సంఘీభావం తెలుపుతున్నాము. వార్తా కథనాలను ప్రసారం చేయడం వలన తమ గౌరవ మర్యాదలకు నష్టం జరిగిందని ఎవరైనా వ్యక్తిగతంగా భావిస్తే, చట్ట పరిధిలో చర్యలు తీసుకోవాలి కానీ, ఇలా ఆస్తుల విధ్వంసానికి, మనుషులను భౌతికంగా నిర్మూలించడానికి ప్రయత్నించడం తీవ్రమైన చట్టవిరుద్ధమైనదిగా పరిగణించి నిందితులపై క్రిమినల్ చర్యలు తీసుకొని భవిష్యత్తులో ఇటువంటి చర్యలు పునరావృతం కాకుండా చూడాలని కేంద్ర, రాష్ట్ర ప్రభుత్వాలను డిమాండ్‌ చేశారు.
ఈ కార్యక్రమంలో వన్నియకుల క్షత్రియ సంక్షేమ మరియు అభివృద్ధి కార్పొరేషన్ డైరెక్టర్ మిన్నల్ రవి, బిసి విభాగం రాష్ట్ర కార్యనిర్వాహక కార్యదర్శి డా.యం.ఉమేష్ రావు, శ్రీకాళహస్తి నియోజకవర్గ ప్రధాన కార్యదర్శి మునిరాజా యాదవ్, నాయీ బ్రాహ్మణ సాధికార సమితి తిరుపతి పార్లమెంటు సోషల్ మీడియా కన్వీనర్ కోట చంద్రశేఖర్, పద్మశాలి సాధికార సమితి తిరుపతి పార్లమెంటు నాయకుడు చింతగింజల సునీల్, బిసి విభాగం నాయకులు భాస్కర్, రామచంద్రయ్య, కృష్ణమూర్తి, వంశీ తదితరులు పాల్గొన్నారు.